Willemstad
Di Wikipedia, e ensiklopedia liber
- E artíkulo aki ta skibí na papiamentu. Lo ta apresiá si por mantené e artíkulo aki na estilo di papiamentu.
Willemstad ta e kapital i stat mas grandi di Kòrsou i di Antias Hulandes i tin un populashon di mas o menos 125.000. E Sint Annabaai ta parti Willemstad propio entre Punda i Otrobanda. For di 1886 e Koningin Emmabrug (e brùg di ponton) ta konektá e dos barionan. Awendia mayoria tráfiko ta pasa riba e Koningin Julianabrug.
Willemstad su arkitektura ta un meskla di varios estilo kolonial hulandes i spañó i esaki a logra buta e stat riba UNESCO su lista di herensia mundial.
[editá] Historia
E spañónan a deskubrí Kòrsou den 1499. Nan lo a yega dia 26 di yüli, dia di Santa Ana, lokual lo splika e orígen di Sint Annabaai su nòmber. Nan a disidí di establesé nan mes na aña 1527.
Den 1634, despues di mas ku shen aña bibá riba e isla, e spañónan a perde Kòrsou na e hulandesnan. Nan a yama e parti ost di e Sint Annabaai De punt, na Papiamentu Punta, lokual a bira Punda. E aña despues, 1635, nan a traha Fort Amsterdam pa defendé e entrada di e haf natural. E ta e forti mas bieu ku e West-Indische Compagnie tabata tin. E stad a desaroya ront di e forti. Na aña 1707 nan a disidí di establesé un bario nobo na e parti west di e Sint Annabaai: Otrobanda. Esaki tabata mirá komo e sentro kultural di e stat.
Riba 30 mei 1969, años di tenshon entre gruponan sosial i derechinan limitá di trahadónan a resultá na un welga. Despues ku welgadónan a tende ku Wilson Godett, lider di sindikato Algemene Haven Unie, a haña bala, nan a sende Heerenstraat na kandela. Hulanda a manda 300 marinier pa restorá orden na Kòrsou.
[editá] Ekonomia
E haf natural tabata e faktor prinsipal den e desaroyo di Willemstad. Ya den siglo 17, Asiento tabata e sentro di negoshi di katibu. Hende tabata trese katibu di Afrika na Kòrsou pa despues nan bai varios destinashon den Sentro- i Sur Amérika.
Despues di abolishon di sklabitut, e ekonomia di Kòrsou a sufri basta. Hopi hende a emigrá pa otro islanan den Karibe buskando trabou. Hopi di nan a haña trabou riba plantashinan di suku na Cuba. Ta te 1914, aña ku Shell a establesé un refineria nobo den Schottegat, e ekonomia a mehorá. E refineria, mihó konosí komo Isla, a ofrese hopi trabou, pa antianonan ku a emigrá i pa strañeronan di, entre otro, Karibe i Sur Amérika. Den e Segundo Guera Mundial e refineria tabata produsí kerosine pa bombarderonan merikano.
For di añanan 1960 Willemstad su ekonomia a kuminsa depende mas riba turismo.
