Konsilio de la Eŭropa Unio
El Vikipedio
La Konsilio de la Eŭropa Unio formas (kun la Eŭropa Parlamento) la leĝdonan filion de la Eŭropa Unio (EU). Ĝi konsistas el ministroj de registaroj de ĉiu membra ŝtato en la EU.
Ne konfuzu ĝin kun la Konsilio de Eŭropo, kiu estas tute aparta internacia organizo, nek kun la Eŭropa Konsilio, kiu estas aparta (sed rilata) institucio de la EU.
La Konsilion asistas COREPER, kiu konsistas el reprezentantoj de la membraj ŝtatoj je la nivelo de diplomatoj aŭ altnivelaj ŝtatoficistoj. COREPER ĝenerale preparas la tagordon de la Konsilio, kaj negocias malĉefajn kaj ne-debateblajn aferojn, forlasante la debateblajn aferojn al diskuto de la Konsilio.
Kvankam laŭleĝe la Konsilio estas unuopa, praktike ĝi dividiĝas al kelkaj apartaj konsilioj, kiuj traktas apartajn kampojn. La Konsilio de Ĝeneralaj Aferoj estas la plej grava el tiuj ĉi, enhavante Ministrojn pri Eksterlandaj Aferoj. Ĉiu konsilio enhavas malsaman specon de ministroj. Do, ekzemple, la Konsilio de Agrikulturo enhavas Ministrojn pri Agrikulturo, ktp.
La Konsilio havas Prezidenton kaj Ĝeneralan Sekretarion. La Prezidento de la Konsilio estas la Ministro pri Eksterlandaj Aferoj de la stato kiu tenas la Prezidantecon en la Eŭropa Unio; dume la Ĝenerala Sekretario estas oficisto, la estro de la Sekretariejo de la Konsilio. La Ĝenerala Sekretario servas kiel la Alta Reprezentanto por la Komuna Eksterlanda kaj Sekureca Politiko (CFSP). La nuntempa Ĝenerala Sekretario estas Javier Solana.
 |
 |
 |
