Vlissienge

From Wikipedia

Liggienge van de gemeênte Vlissienge in Zeêland

Vlissienge (Nederlands: Vlissingen) is 'n Zeêuwse stad en gemeênte, die-a op Walcheren leit, te zuden van Middelburg. Bie de gemeênte oren ok nog de durpen Oôst-Soeburg, West-Soeburg (wat-a vandaeg d'n dag meêr 'n stadswiek is) en Rittem. De gemeênte eit 'n oppervlak van 344,97 km², daevan 310,08 km² waeter is. Op 1 juni 2005 ao de gemeênte 45.236 inweuners. Vlissienge leit an 't end van de spoôrwegt uut Roosendaal, en eit oôk nog 'n station Vlissienge-Soeburg.

1 Stadsfuncties
2 Stadsbeêld
3 Geschiedenisse
4 Bekende Vlissiengers
5 Trivia
6 Lienk nae buten

[bewerk] Stadsfuncties

Vlissienge is vanouds geên bestierlik centrum, mae meêr 'n andelsstad. Vandaeg d'n dag nog eit 't 'n aeve (Vlissienge-Oôst), en 'n bescheie scheepsindustrie. 't Eit vedders 'n schoôlegemeênschap (Scheldemond) en 'n ziekenuus. Cultureel staet 't mee Middelburg op glieke voet: 't mist 'n concertzael maer ei wel 'n groôtere bioscoop.

[bewerk] Stadsbeêld

Deu 't bombardement van 1940 eit Vlissienge weineg monumente. De Jacobskerke uut de vuuftiende eêuw mee bescheie toren en intersant schip (mee afwiekende boôgen) is dae 'n vobild van; vedders is vee bebouwing van nae d'n Tweêden Wereldoolog. An 't Bellamypark staen nog 'n paor ouwe uzen.

[bewerk] Geschiedenisse

De vroege geschiedenisse van Vlissienge is nie goed gedocumenteerd; dienkelik was 't in de Middeleêwen 'n vissersdurpje. Ok over de naem bin ze 't nie eêns. In 1315 kreeg 't stadsrechten, al zou 't nog 'n stuitje diere toet 't mee Middelburg kon concurrere. Die kans kreeg 't vanaf de zeventiende eêuw, toen-a de toegank nae Middelburg steês moeiliker wier en den aeve van Vlissienge daedeur antrekkeliker g'ore was veu schippers. Op 6 april 1572 sloôt Vlissienge z'n eige as derde stad in de Nederlanden bie d'n Opstand an.

In de negentiende eêuw kon 't z'n eige rillatief goed staende ouwe. In mei 1940 wier Vlissienge, mee Middelburg, zwaer gebombardeerd deu de Duutsers. In 1966 wiere de gemeênten Oôst- en West-Soeburg en Rittem an Vlissienge toegevoegd.

[bewerk] Bekende Vlissiengers

Maarten Ducrot, wielrenner
Jean-Louis Pisuisse, cabaretier
Michiel de Ruyter, admiraol

[bewerk] Trivia

De New Yorkse wiek Flushing is nae Vlissienge genoemd.

[bewerk] Lienk nae buten

Gemeênte Vlissingen

Provincie Zeêland
Gemeênten Bossele \| Goes \| Kapelle \| Middelburg* \| Noord-Beveland \| Reimerswaol \| Schouwen-Duveland \| Sluus \| Terneuzen \| Tole \| Ulst \| Ter Veere \| Vlissienge
Waeterschappen Zeêuwse Eilanden - Zeêuws-Vlaonderen
Belangrieke streken Schouwen - Duveland - Noord-Beveland - Tole en Flupsland - Walchren - Zuud-Beveland - Zeêuws-Vlaonderen
Belangrieke wegten en waeterwegten Wegten: N57 - A58 - N59 - N61 - N62 - N255 - A256/N256 - N257 Waeterwegten: Grevelienge - Oôsterschelde - Onte - Schelde-Rienkanaol - Kanaol Gent-Terneuzen
Nederland \| Provincies \| Gemeênten