konstantis. poi re moi
From Wikipedia
ni'o la fla,ui,us. .iulius. konstantius. goi ko'a cu jbena fi li nocipaze pi'e nobi pi'e noze gi'e mrobi'o de'i li nocixapa pi'e 11 pi'e noci gi'e latmo nolraitru de'i li nocicize bi'o nocixapa fi'o turni se lanzu la poi banli konstantinus goi by ky
ni'o ko'a re moi lo'i ci bersa be by ky e lo re moi speni be ri be'o no'u la faustas i ko'a jbena fo la sirmium pe se di'o la ilIrikum gi'e binxo lo viptru to va'i la kaisar toi gau lo patfu be ko'a i ko'a ca lo nu by ky de'i li nocicize cu mrobi'o cu catni lo nu lo se dzena be la konstantius xlorus poi pafpa'u ko'a ku'o e la te,odoras poi re moi speni be ky xy cu se catra i ja'e bo ko'a ce la poi ci'orme'a bruna konstantinus poi re moi ku'o ce la poi ci'ormau bruna konstans ce re loi tamne no'u la iulianus e la galus ge'u ce no drata cu jmive ke nakni seldze la poi banli konstantinus i loi bi'u nai ci bruna se va'u vo'a cu fendi lo latmo sosygugje'a ca'i lo cedyxu'a flaselci'a pe lo patfu be vo'a i ja'e bo la poi re moi konstantinus cu turni la britanias jo'u la galias jo'u la xispanias i je bo la konstans turni la italias jo'u la Afrikas jo'u la ilIrikum i je bo ko'a turni le stuna pagbu
ni'o lo ka ce'u se fendi cu se galfi lo nu la poi re moi konstantinus ca'o lo nu troci lo nu vlile basti la konstans lo zu'o turni la italias kei de'i li nocivono cu mrobi'o i ja'e bo la konstans po'o binxo lo turni be le stici pagbu be lo sosygugje'a i lo ka ce'u se fendi cu za'u re'u se galfi de'i li nocimuno se ja'e lo nu la konstans va'o lo nu damba cu se catra loi sonci poi tinbe la magnentius poi flapro
ni'o ko'a pu'o lo nu go'i cu tolzi'e ki'u lo nu damba lo me la sasan sosygugje'a i ki'u bo ko'a bai jai gau binxo fai la poi tamne ko'a galus lo viptru to va'i la kaisar toi be le stuna pagbu te zu'e lo nu gy sidju ko'a ca lo nu ko'a jundi la magnentius
ni'o ko'a de'i li nocimupa va'o lo nundamba be bu'u la mursama,ior be'o poi so'u moi lo'i nundamba be loi latmo lo ni morsi cu penmi my gi'e jinga fi my i my vo'a de'i li nocimuci cu catra i ba zi bo ko'a minde lo nu la galus cu se catra i je ku'i ko'a ru'i na kakne lo nu jatna lo jamna cuntu be bu'u ge lo stuna korbi gi ji'a lo dotco korbi si'u no da i se ki'u bo ko'a gasnu lo nu la iulianus poi ro moi lo'i nakni se lanzu be lo lanzu be ko'a ku'o cu binxo la kaisar i ko'a ca lo nu la iulianus cu co'a se rinsa loi sonci be bu'u la galias lo si'o i bu ralja'a cu se xanri no drata be lo nu gunta i bu i ko'a pu lo nu lo re bilni cu simxu penmi cu mrobi'o ri'a lo se bi'agla vi la tarsus de'i li nocixapa pi'e 11 pi'e ci i ba bo i bu cu co'a se rinsa lo prenu pe pi ro lo sosygugje'a lo si'o vo'a ralja'a
ni'o ko'a ta'e zukte se cuntu zo'e pe lo xi'ojda i ko'a so'i roi sarji loi xi'orseljda pe la arius i ko'a de'i li nocimuso minde lo nunjmaji be bu'u la rIminis
ni'o ko'a ci roi spebi'o i ko'a pa re'u spebi'o pa tixnu be la iulius konstantius gi'e re re'u spebi'o la e,usebias gi'e ci re'u spebi'o la faustinas poi ke'a ba lo nu ko'a mrobi'o cu se jbena la faustinas konstantias poi ba spebi'o la gratianus poi latmo nolraitru