Volumenaĵo
El Vikipedio
Volumenaĵo estas solida inerta substanco de konvena grajneco, kiu el vidpunkto de volumeno estas la baza komponento de betonmiksaĵo kaj betono.
Ŝtonaro - natura aŭ artefarita neorganika grajneca materialo destinita por konstrua celo; la grajnoj de ŝtonaro trapasas la reg-kribrilon kun kvadrataj truoj de grandeco 125 mm.
Natura ŝtonaro - ŝtonaro minata el naturaj kuŝejoj aŭ pistata el natura ŝtono.
Artefarita ŝtonaro - ŝtonaro konscie fabrikata aŭ akirata el defalaĵoj de energetikaj entreprenoj kaj industrio.
Aluvia ŝtonaro - ŝtonaro estiĝinta per natura diseriĝo de rokoj, kun la grajnoj ovaligitaj naturmaniere, akirata per minado; ĝi povas enhavi egalgrade almiksitan kvanton de grajnoj akiritaj per pistado de silikoj, sed sume malpli ol 40 % de la maso de ŝtonaro.
Pistita ŝtonaro - ŝtonaro akirita per pistado de ŝtonpecoj, ev. de aliaj neorganikaj substancoj, kaj ŝtonaro akirita el montaraj ŝtonŝutaĵoj.
Fajna ŝtonaro - ŝtonaro, kies grajnoj trapasas la reg-kribrilon kun kvadrataj truoj de grandeco 4 mm.
Malfajna ŝtonaro - ŝtonaro, kies grajnoj restas sur la reg-kribrilo kun kvadrataj truoj de la grandeco 4 mm, sed trapasas la truojn de la grandeco 125 mm. Permesata sinonimo: groba ŝtonaro
Grajneco (de ŝtonaro) - proporcia procenta konsisto de ŝtonaro laŭ sumaj volumenoj de grajnoj de unuopaj grandecoj.
Frakcio (de ŝtonaro) - sumo de diverse grandaj ŝtongrajnoj en la intervalo de du najbaraj reg-kribriloj kun kvadrataj truoj haltiĝintaj sur la malsupra reg-kribrilo (kun malpli grandaj truoj), sed trafalintaj tra la supra reg-kribrilo (kun pli grandaj truoj) senkonsidere de la grajnoj sur la plej supra kaj sub la plej malsupra kribriloj.
Sablo - fajna aluvia ŝtonaro.
Gravelo - malfajna aluvia ŝtonaro.
Gruzo - pistita ŝtonaro, kiu ampleksas la fajnan frakcion (0 - 4 mm) kaj parton de la malfajna frakcio (4 - 22 mm); la dimensioj estas konvenciaj.
Ŝotro - pistita ŝtonaro, malfajna frakcio super 22 mm laŭ la reg-kribrilo.
Gravelsablo - natura miksaĵo de aluvia ŝtonaro fajna kaj malfajna, limigita per la supra reg-kribrilo 125 mm.
Ŝotrogruzo - miksaĵo de pistita natura ŝtonaro fajna kaj malfajna, limigita per la supra reg-kribrilo 125 mm.
Ŝtonpulvoro - natura ŝtonaro kun pulvoraj grajnetoj, kiuj estas produktataj per muelado de ŝtonoj, aŭ ili aperas kiel polvo ĉe la fabrikado kaj klasado de pistita ŝtonaro; grajndimensio kutime 0,06-0,002 mm.
Kompakta ŝtonaro - ŝtonaro de la volumena maso (denseco) super 1800 kg/m3 (konvencia valoro).
Por(hav)a ŝtonaro - ŝtonaro de la volumena maso (denseco) 1800 kg/m3 kaj malpli.
Skorio - en bruliga proceso kunbakitaj mineralaj restaĵoj de diversaj specoj de ŝtona kaj bruna karboj, brulardezoj kaj de aliaj solidaj brulaĵoj, kiuj estiĝas en kradaj fajrejoj.
Ŝlako - silikata fandaĵo, kiu aperas kiel akcesora produkto ĉe metalurgia procedo, ekz. la altforna; ĝi povas servi kiel krudaĵo por ŝlaka pumiko.
Ŝaŭmigita volumenaĵo - artefarita malpeza volumenaĵo, kiun oni produktas per ŝaŭmigo.
Ŝlaka pumiko - produkto de rapida malvarmigo de fandita likva ŝlako, kiu ekŝaŭmas, solidiĝas kaj hardiĝas, sekve pistita kaj klasigita. Permesata sinonimo: ŝaŭmigita ŝlako
Ekspansiigita ŝtonaro - arte malpezigita ŝtonaro, fabrikata el akvohavaj rokmaterialoj, argilaj ardezoj k.s., kiuj per subita ardigo pligrandigas sian volumenon.
Ekspansiigita perlito - perlito, vitreca vulkanaĵo, disfalema en globetojn, per forta varmigo (kalcinado) ĝi pluroble kreskigas la volumenon; malpeza grajneca blanka materialo de volumena maso (denseco) 100-150 kg/m3.
Aglomerita ŝtonaro - malpeza artefarita volumenaĵo, fabrikita el pulvora ŝutiĝema substanco per aglomerado (granuligado); ekz. el flugcindro, skorio.
Flugcindraj granuloj]] - flugcindro miksita kun diversaj ingredientoj kaj ligento, granuligita kaj poste hardita en brulo.
Almiksaĵo al betono - fajne muelita pulvora substanco aldonata en betonmiksaĵon en kvanto pli granda ol 10 % de la maso de ligento (cemento) por influi certajn proprecojn de freŝa, hardiĝanta kaj firma betono.
Surfacaktiva almiksaĵo - fajne muelita pulvoro aŭ suspensio de tia pulvoro malseke muelita, plej ofte silikata aŭ aluminata, kiu aktive partoprenas en la hidratiga proceso kaj en la kreado de liga pasto en betono.
Plenigpulvoro - la plej fajna ŝtonaro el pistitaj kaj muelitaj ŝtonoj, plej ofte kalkŝtonoj, kiu dum kribrila klasifikado trapasas la truojn 0,09 mm; ĝi funkcias kiel volumenaĵo de cementbetonoj, asfaltobetonoj, en certa kvanto plibonigas prilaboreblon de betonmiksaĵo, altigas akvohermetecon kaj kompaktecon de betono.
