Marek Blahuš
El Vikipedio
Marek BLAHUŠ [blahuŝ] (naskiĝis la 16-an de majo 1986) estas ĉeĥa esperantisto, unu el la gvidantoj de Ĉeĥa Esperanto-Junularo. Li estas ankaŭ komitatano A de TEJO (2005-) kaj estrarano de E@I (2006-).
En Ĉeĥio li loĝas en Uherské Hradiště, sed ekde 2005 studas en Brno ĉe la Masaryk-Universitato la fakon aplikata informadiko. Krom komputiko kaj komputila lingvistiko liaj hobioj estas ankaŭ genealogio kaj fremdlingvoj.
Esperanton li eklernis somere de 2003 per interreto kaj konatiĝinte kun aliaj junaj ĉeĥaj esperantistoj, kunfondis kune kun Dagmar Chvátalová kaj Tomáš Břicháček novan memstaran organizon Ĉeĥa Esperanto-Junularo (ĈEJ), fariĝis ĝia unua vicprezidanto kaj interalie prizorgas por ĝi ankaŭ retpaĝaron. Li estas ankaŭ gvidanto de la Brna klubo de ĈEJ.
Blahuš multe vojaĝas, vizitante diversajn precipe junularajn esperanto-aranĝojn, por ligi kunlaborajn konktaktojn. Unu tia vojaĝo, kiun li entreprenis dum julio kaj aŭgusto de 2006, ampleksis 33 tagojn, 9 vizititajn landojn kaj 5 aranĝojn (ISAE-centjariĝo, 91-a UK, 62-a IJK, 19-a IJS kaj restado en Budapeŝto kun vizito ĉe MELA). Li mem estas gastiganto de Pasporta Servo.
En junularaj renkontiĝoj li estas konata kiel filmejestro (organizas projekciadon de filmoj en esperanto kaj kun esperantlingvaj subtekstoj). Inter 2005 kaj 2006 li aktive partoprenis en la projekto Vikipedio en Esperanto (Vikipediisto:Blahma) kaj ankaŭ efektivigis ĝian unuan eksterretan "eldonon", kadre de la DVD Esperanto Elektronike produktita de E@I. Ene de E@I li ankaŭ ĉefrespondecis pri la trejnseminario Lingvoj en interreto okazoita novembre de 2006 en Brno. Per propra iniciato li en aŭgusto de 2006 realigis la busan karavanon inter la 91-a UK en Florenco kaj la 62-a IJK en Sarajevo.
Ĉe la Masaryk-Universitato li ĉeestis esperanto-kurson de Josef Vojáček, ĉeĥa pedagogo kaj esperantisto.
