Blankkola longvosta fazano
El Vikipedio
| Blankkola longvosta fazano | |||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|
 |
|||||||||||||||||||||
| Biologia klasado | |||||||||||||||||||||
|
|||||||||||||||||||||
| Binoma nomo / Trinoma nomo / ktp. | |||||||||||||||||||||
| Syrmaticus ellioti
Swinhoe 1872 |
La blankkola longvosta fazano (Syrmaticus ellioti) el la ordo de Kokoformaj birdoj kaj familio de fazanedoj estas speco propra al Ĉinio kaj vivas en suda Anhuj, okcidenta Ĝeĝjang, nordokcidenta Fuĝjan, orienta Ĝjangŝji kaj norda Gŭangdong. Ĝi apartenas al loĝbirdoj.
La maskla birdo havas malhelan kapon kaj blankan kolon; ĝiaj supra dorso kaj brusto estas brunaj, ankaŭ ambaŭ flugiloj estas brunaj, kun blankaj makuloj; la malsupra dorso kaj talio estas nigraj, kun blankaj makuloj, la vosto griza, kun larĝaj brunaj makuloj. La femala birdo sin vestas per kaŝtanbrunaj plumoj, la supra korpo estas plena de nigraj strioj kaj makuloj, la dorso estas ornamita per blankaj lancoformaj strioj; la ventro montriĝas brunblanka, la eksteraj vostoplumoj plejparte estas brunaj. La birdo longas 45-85 cm., pezas 500-1 100 g. kaj ĝia vosto estas 17-47 cm. longa.
La blankkolaj longvostaj fazanoj loĝas en montregionoj kaj en arbaroj en montvaloj kaj ankaŭ videblas en densaj bambuaroj kaj arbustaroj en maldensaj pinaroj. Ili agas aŭ pare aŭ grupete laŭ malsamaj sezonoj. Ili estas timemaj, malofte krias, kaj pro tio ili estas malfacile troveblaj. Ili lertas en kurado kaj flugado kaj loĝas ne miksante sin kun alispecaj fazanoj. Guŝoj, semoj, beroj kaj junaj folioj estas iliaj ĉefaj manĝaĵoj. Marto kaj aprilo estas ilia pariĝa sezono. Tiam la birdoj flugas en la aero svingante la flugilojn kaj akute krias. Persekutante la birdinon, la virbirdo sin turnas al la lasta, tenante unu flugilon malsupren kaj la alian supren, kun vosto etendita flanken, kaj obtuze krias. Ĝi ne ĉetas persekuti antaŭ ol pariĝi.
Ili estas facile bredeblaj birdoj. Post kiam la birdino demetas 6-12 ovojn, ĝi komencas kovi ilin. La kovado daŭras 24-25 tagojn. La ĵus elkovita ido havas pezon de 20 g. Bredate la birdidoj elkreskas post unu jaro, tiam la junaj virbirdoj jam ekhavas deziron de pariĝo; ankaŭ la junaj birdinoj povas demeti ovojn, sed malmultaj el ili povas esti fekundigitaj. La maturiĝo de la birdoj bezonas du jarojn en la naturaj kondiĉoj.
