Muziek
From Wikipedia
Muziek is 'n vurm van Kunst die-a d'r eige bezegouwt mee geluud. D'r bin vee definities van muziek, die-a nogal flink van mekarre kunne verschille, om-a d'r in amparte culturen zovee verschillende muziek gemaekt oort. Zoô bin d'r volkeren, die-an 't woôrd muziek nie eêns is kenne. Oôk kan je de beteêkenis van 't woôrd in de westerse wereld goed zien veranderen deu de eêuwen ene. Belangrieker dan de definitie van 't woôrd muziek is toch de notie d'rvan: bie de meêste mensen is 't meteên dudelik of 'n stik geluud wel of geên muziek is, al bin d'r wel twuvelgevallen.
De muziek oort, nog meêr as andere kunstvurmen, ingedeêld in genres. Daerbie bin d'r tweê utersten: 'n indeêlienge nae stiel en cultuur en 'n indeêlienge nae toepassienge. Bie 't eêrste oort de muziek ingedeêld in Westerse muziek, Afrikaonse muziek, Indiaose muziek, enzoôvedder. Bie 't tweêde ei-je 't over kunstmuziek, amusementsmuziek, volksmuziek en Toegepaste muziek. Toch is geên van deze tweê indeêlienge bie ons gebrukelik: meêstal spreke ze van klassieke muziek, popmuziek, Wereldmuziek en jazz en blues. Bie die indeêlienge staet 't Westen wel glad in 't centrum: alle andere muziek dan de westerse oort ineêne onder Wereldmuziek weggezet!
In sommege muziekculturen, voôraol die mee 'n kunstmuziek, bestaet 'n muziektheorie. De weêtenschap die-a de muziek bestudeerd eêt muziekweêtenschap of musicologie.
[bewerk] Muziek in Zeêland
Ziet oôk Bløf, Surrender, Zeêuws Orkest.
