Bingu wa Mutharika

From Wikipedia

[edit] Mdauko wa mulongozgi wachitatu wa chalo cha Malaŵi

Bingu wa Mutharika wakababika mu mwezi wachibili pa zuba la makhumi yabili na yanayi (24 February) mu chaka cha 1934. Mutharika kwawo ni mu boma la Thyolo ilo lili pafupi-fupi ma kilometre makhumi yatatu (30) kufuma mu msumba wa Blantyre. Awiske ba Bingu bakaba basambizgi ba sukulu yakwamba (primary school). Wati wamalizga masambilo mu Malawi wakaluta na kukapanga masambilo ku sukulu ya masambilo yapachanya ya ku Delhi (University of Delhi) ku chalo cha India. Uku, Mutharika wakawukako na masambilo ayo pa chingelezi bakuti Masters Degree mu vyakukhwaskana na vyuma (Economics). Wati wamala masambilo ayo, wakapangaso masambilo yapachanya chomene (Doctorate Degree) ku sukulu ya Pacific Western University ku Los Angeles, mu chalo cha America.

Mutharika wakagwilapo ntchito mu boma mu vyalo vya Malaŵi na Zambia ndipo mu chaka cha 1978 Mutharika wakanjila ntchito ku United Nations uko wakakwela kufika pa kuba mulala wa nkhani ya chuma cha malonda na chitukuko (Director of Trade and Development Finance) mu Africa. Mu chaka cha 1991 Mutharika wakalembeka ntchito kuba mulala wa wupu wa vya malonda wa vyalo vya ku mafumilo ya zuba na ku mwela kwa Africa (Common Market for Eastern and Southern Africa), COMESA.

Ku Malaŵi kwati kwayamba boma la vipani vinandi mu chaka cha 1993, Mutharika wakaba mumoza mwa banthu awo bakayamba chipani cha United Democratic Front (UDF) ndipo wakati wawona kuti wakupulikana yayi na wendeskelo wa Bakili Muluzi pa nkhani ya chuma cha Malaŵi, Mutharika wakayamba chipani chake chakuchemeka United Party mu chaka cha 1997. Mu 1999 Mutharika wakayezga kuyima pa chisankho cha mulongozgi wa Malaŵi kweni wakatondeka.

Bati bamuchimbizga ntchito ku COMESA, Mutharika wakagwilapo ntchito ngeti ni wachibili kwa mulala wa banki yikulu ya Malaŵi (Reserve Bank of Malaŵi) ndipo mu 2002 wakasoleka kuba nduna ya kunozga vya chuma na chitukuko (Economic Planning and Development).

Mu chaka cha 2003 Mutharika wakasoleka na Bakili Muluzi kuti wabe muyimilili wa chipani cha United Democratic Front (UDF) pa chisankho cha mulongozgi wa chalo cha Malaŵi. Nanga uli banthu banandi mu UDF bakakondwela yayi na kusankhika kwa Mutharika na Muluzi pa iyo yekha ndiposo banyakhe banandi bakafumamo mu UDF chifukwa cha nkhani iyi, Mutharika wakachiyimilila chipani ichi ndipo pa chisankho icho chikachitika pa zuba la makhumi yabili la mwezi wachinkhondi (20 May) mu chaka cha 2004 Mutharika wakasoleka kuba mulongozgi wa Malaŵi pa chisankho icho banthu banandi, kusazgilapo bayimilili ba European Union bali kuti chikaba chakwibila. Pa zuba la makhumi yabili na chinayi mu mwezi wene uwu wachinkhondi (24 May) Mutharika wakazgoka mulongozgi wachitatu wa Malaŵi.

Banthu banandi bakaghana-ghananga kuti Mutharika wabenge ‘mzguka’ (puppet) wa Muluzi kweni pa myezi yakwamba Mutharika wawoneska kuti wapambana chomene na Muluzi uyo wakasakazanga na kwiba ndalama za boma.

Mutharika wakayamba makola chomene ulongozgi wake kweni vikuwoneka kuti nayo vimbundi ni vinanndi kuti waka wakwiba mwakuchenjela. Mutharika wakuwoneka kuti ni munthu mutesi chomene chifukwa vinandi ivyo wakuyowoya vikuwoneska wuchenjezi wake.

Pa zuba la 8 February 2006 Mutharika wakamupiskikizila wachibili wake Cassim Chilumpha kuti wali kezgekapo pa mpando wake wa wuchibili wa mulongozgi wa chalo cha Malaŵi nanga uli kuti ni nthena yayi.