Opava
Z Wikipedije
Opava je město na sewjerowuchodźe Čěskeje republiki: Wone je nětko jedne z wjetšich městow morawsko-šleziskeho kraja, historisce běše Opava hłowne město toho dźěla Šleziskeje, kotryž wosta po wójnach we 18. lětstotku při krajach Čěskeje króny.
Ma něhdźe 60.000 wobydlerjow, kiž su zdźěla awtochtoni wobydlerjo toho města a regiona, zdźěla přindźech po wójnje z druhich kónčin Čěskeje a Słowakskeje, wosebje z kónčin wokoło Brna. W Opavje je cyły rjad zakładnych a wyšich šulow, eksistuja někotre powołanske šule a wot lěta 1991 tež Šleziska uniwersita.
Opava je přeco hišće kulturne a politiske srjedźišćo regiona tak mjenowaneje Čěskeje Šleziskeje. W měsće a wokolinje namakaja so wjacore industrijowe zawody, na př. mašinotwarski zawod Ostroj za mašiny do wuhlowych podkopkow a farmaceutiski Galena, kiž je najstarši farmaceutiski zawod nic jenož w Čěskej, ale na cyłym teritoriju něhdyšeje Rakusko-Wuhorskeje. Wobydlerjo wosebje z bliskich wsow rěča specifiski dialekt, kotryž je trochu zdaleniši wot spisowneje čěšćiny a je bliši nic jenož pólšćinje, ale tež serbšćinje, štož so při wosobinskich kontaktach ze Serbami lochko spóznawa. Přećelske zwiski mataj Maćica Opavska a Maćica Serbska, kaž tež chóraj Stěbořice a Budyšin a chóraj Křižkovský a Delany.
