Korla Awgust Kocor
Z Wikipedije
Korla Awgust Kocor (* 3. decembra 1822 w Zahorju pola Budestec; † 19. meje 1904 w Ketlicach pola Lubija), němske mjeno Karl August Katzer, bě serbski komponist a narodny prócowar.
Wobsah |
[wobdźěłać] Žiwjenje
Po zakónčenju ludoweje šule w Budestecach zastupi Kocor w l. 1838 do Krajnostawneho wučerskeho seminara w Budyšinje, zo by so na wučerstwo wukubłał. Po studiju bu w l. 1842 jako wučer w Stróži pola Rakec přistajeny. W nazymje lěta 1844 zetkaše so prěni raz ze serbskim basnikom Handrijom Zejlerjom. Kocor běše załožer Serbskich spěwnych swjedźenjow, kiž so 17. oktobra 1845 w Budyšinje prěni raz wotměwachu. Zetkanje z Handrijom Zejlerjom bě wuměłsce jara produktiwne - tak stwori Kocor melodije za wjele basnjow Zejlerja, kotrež hač do dźensnišeho jara woblubowane su. Wosebje za swoju twórbu "Počasy" po štyri episkich basnjach Zejlerja je wón w hudźbnych stawiznach připoznaty. 1852 přewza Kocor městno wučerja a organista w Ketlicach. Tute dźěło zdokonja hač na wumjenk w lěće 1888. Wot 1895 do 1897 skutkowaše wón jako předsyda hudźbneho wotdźělenja serbskeje wědomostneje akademije Maćicy Serbskeje, kotraž jeho 1895 jako čestny čłon přiwza.
[wobdźěłać] Twórby
[wobdźěłać] Oratorije
- Serbski kwas, 1849/50
- Žně, 1849/83
- Nalěćo, 1860
- Israelowa zrudoba a tróšt, 1861
- Podlěćo, 1883
- Nazyma, 1886
- Zyma, 1889
- So zwoni měr, 1891
- Serbski rekwiem, 1894
- Wěnc hórskich spěwow, 1860
[wobdźěłać] Opera
- Jakub a Kata, 1871
[wobdźěłać] Spěwohra
- Wodźan, 1896
[wobdźěłać] Instrumentalna hudźba (wuběr)
- Tři sonatiny za husle a klawěr, 1850
- Klawěrne trio, 1873
- Smyčkowy kwartet, 1879
- Tři serbske narodne reje za klawěr, 1879
- Serenada za husle, braču a wioloncello, 1889
[wobdźěłać] Literatura
- Frido Mĕtšk, Kocorowe zawostajenstwo, Budyšin 1971
- Zbigniew Kościów, Korla Awgust Kocor, Budyšin 1972
- Jan Rawp, Serbska hudźba, Budyšin 1979
Kategorije: Serb | Hudźba | Hudźbnik | Rodź. 1822 | Zemr. 1904
