FC Hansa Rostock

Z Wikipedije

Stawizny mustwa

1954 přikaza so rudnohórskemu mustwu z Lautera pola Auwy přećahnyć do Roztoka. Knježerstwo NDR chcyše tak spěchować kopańcu na teritoriju dźensnišeje Mecklenburgskeje. Přez nóc přemjenowa so mustwo potajkim wot Empor Lauter na Empor Rostock a hraješe wot tutoho časa w prěnjej koparskej lize NDR.

28. decembra 1965 wutwori so naslědne mustwo FC Hansa Rostock. Hač k politiskemu přewrótej 1990 hraješe zwjetša w najwyšej lize, wotstupi wšak dohromady pjeć króć. 1967 do 1969 běchu trójce zasobu wicemišter za mustwom Dynamo Drježdźany a stejachu zdobom trójce w finalu FDGB-pokala.

Po politiskej změnje sta so Hansa Rostock z poslednim mištrom a pokalnym dobyćerjom něhdyšeje NDRskeje wyšeje ligi a kwalifikowaše so tak hromadźe z drježdźanskim mustwom za zwjazkowu ligu. Tam wšak so mustwo dźeržeć njemóžeše, hačrunjež doby dwójce přećiwo mustwje Bayerow z Mnichowa a na spočatku sezony samo pjeć razow zasobu tabulku nawjedowaše.

Po zestupje hraješe mustwo tři lěta w druhej zwjazkowej lize a nawróći so 1995 do prěnjeje ligi. Tam wosta 10 lět, doniž w lěće 2005 znowa njezestupi. W druhej lize hraja nětko zaso přećiwo staremu riwalej Dynamo Drježdźany.

Mustwo sezony 2005/2006

hrajerjo: Antonio Di Salvo, Denis Lapaczinski, Rade Prica, Menezes da Silva Gledson, Kim Madsen, Martin Pohl, Tim Sebastian, Kevin Hansen, Zsolt Löw, Enrico Gaede, Marc Stein, David Rasmussen, Flávio Pereira, Michael Hartmann, Amir Shapourzadeh, Oumar Kondé, Marcel Schied, Carsten Busch, Mathias Schober, Axel Keller, Ronald Maul, Magnus Arvidsson, René Rydlewicz

trenar: Frank Pagelsdorf

ko-trenar: Timo Lange

trenar wrotarjow: Perry Bräutigam