Chrósćicy
Z Wikipedije
| Wopon | Karta |
|---|---|
 |
 |
| Zakładne daty | |
| Zwjaskowy kraj: | Sakska |
| Knježerstwowy wobwod: | Drjezdźany |
| Krajny wokrjes: | Kamjenc |
| Płonina: | 13,32 km² |
| Wobydlerjo: | 1.172 (30. september 2005) |
| Hustosć wobydlerstwa: | 88 wobydlerjo na km² |
| Wysokosć: | 170 nad NN |
| Póstowe ćisło: | 01920 |
| Telefoniska předwólba: | 035796 |
| Kfz-znamjo: | KM |
| Hamtski kluč gmejny: | 14 2 92 090 |
| Rozčłonkowanje sydlisća: | 6 wjesnych dźělow |
| Adresa gmejnskeho zarjadnistwa: |
Při pastyrni 40 01920 Chrósćicy |
| Stronka w syći: | www.crostwitz.de |
| E-mailowa adresa: | Gemeindeverwaltung@Crostwitz.de |
| Politika | |
| Wjesnanosta: | Maćij Brycka |
Chrósćicy (něm. Crostwitz) je gmejna w Hornej Lužicy kotraž so nědźe 12 km wuchodnje města Kamjenc nadeńdźe. Gmejna słuša k zwjazkej zarjadnistwow „Při klóšterskej wodźe”. Přez 90% ludnosće wobknježi serbšćinu a němčinu a wjele z wobydlerjow ma serbšćinu jako maćernu rěč. Žiwe nabožne žiwjenje słuša k serbskej tradiciji. W ludowym erće so husto praji zo su Chrósćicy srjedźišćo Horneje Łužicy.
Přez Chrósćicy běži rěka Satkula.
Wobsah |
[wobdźěłać] Stawizny
Wjeska so hižo 1225 jako Crostiz naspomni. W aprylu 1945, w druhich kónčinach beše 2. Swětowa Wójna hižo dokónčena, wotměwachu so w Chrósćicach wojowanja mjez wojerstwom juh, někotrymi SS-zjednoćenstwami a Čerwjenym wojskom. Pomnik na Fulkec hórce w Chrósćicach dopomni na wopory, kiž běchu prědewšěm pólscy wojacy. Dnja 10. meje 1945 (jenož 5 dnjow po skónčenju poslednich wójnskich aktiwitow) so najwažniše serbske towarstwo Domowina znowazałoži.
[wobdźěłać] Wjesne dźěle
Ke gmejnje słušeja wjeski Chrósćicy, Korzarcy, Hórki, Prawoćicy, Kopšin a Nuknica.
[wobdźěłać] Kubłanje
Kubłanje w Chrósćicach a wokolinje započa so hižo w pěstowarni: w serbskej pěstowarni „Při pastyrni". Tuta pěstowarnja wobdźěli so na WITAJ-projekće k zdźerženju serbskeje rěče. Witani su tu wšitke serbske a němske dźěći w starobje wot 6 do 10 lět. Serbska zakładna šula „Jurij Chěžka” je tohorunja do WITAJ-projekta zapřijata. Srjedźna šula „Jurij Chěžka” so w lěće 2003 po mnohich demonstracijach dla małeje ličby šulerjow zawrě. W lěće 2002 zakónćeše so twar starownje swj. Ludmile. Wot tuteho časa sem wita starownja wšitkich pomocypotrěbnich starych ludźi.
[wobdźěłać] Kultura a wobhladanja hódne
Chrósćicy leža w juho-zapadźe sydlisćoweje kónčiny Serbow w Hornej Łužicy. Při chromach pućow pokazaja křiže, modlenske stołpy a serbske napisma (na přikład wjesne tafle abo mjena pućow) žiwosć serbskeje rěče a kultury, kotraž nosy husto katolski raz. Serbske tradicije so wosebje w Chrósćicach a w kónčinje dokowokoło jara hladaja, tak zo so tu kóžde lěto chodojty pala, meje mjetaja, ptački kwasuja a swjateho Měrćina swjeći. Tež wjacezaměrowa hala „Jednota” so husto za kulturelne poskitki wužije: wotchadnička abiturijentow, kóžde druhe lěto mjezynarodny folklorny festiwal, nazymske koncerty, Schadźowanka, kopańcowy turněr TCM, předstajenje ptačokwasneho programa Serbskeho ludoweho ansambla za dźěći a dorosćenych so w tutej hali prawidłownje wotměwaja.
1772 natwarjena farska cyrkej je kóžde lěto centralny dypk wšěch Chrósćanskich křižerjow. Po zhromadnej mši wšitkich jěcharow jěchaja tute do susodneje gmejny Pančicy-Kukow.
Na Chrósćanskim kěrchowje leži sławny serbski spisowaćel Jurij Brězan pohrjebany.
Dalše atrakcije:
- serbska lajska dźiwadłowa skupina Chrósćicy
- dujerska kapała Horjany
- Serbski folklorny ansambl Wudwor
- stary a nowy pomnik za padłych pólskich wojakow
- cyrkej swjateju japoštowoł Symana a Judy Tadeja
- tykowany dom w Chrósćicach
- swjećatko w Prawoćicach
- postawa swj. Marije w prózdnjeńcy
[wobdźěłać] Sławne wosobiny
- Jakub Jan Wóski z Bärenstamma, serbski biskup (1692-1771)
- Jurij Kokula (1562-1620)
- Jurij Winger (1872-1918)
