Sabbe August

Läteq: Wikipedia

Sabbe August (August Sabbe) (sündü 1. süküskuu pääväl 1909 Rõugõ kihlkunnan Paidra külän Palo talon, kuuli 27. süküskuu pääväl 1978, om matõt Tarto Raadi kalmuaida) oll' mõtsaveli, kinkal õnnõstu hinnäst kõgõ kavvõmb Vinne võimo iist käkki.

Sisukõrd

1 Elolugu
2 Haridus
3 Mälehtüse hoitminõ
4 Välislink

[toimõndaq] Elolugu

Sabbe Augusti kats' vanõmbat veljä saivaq hukka Vabadussõan. Esä kuuli 1929. August jäi talo perijas ni elli ja tüüt' sääl vindläisi tulõkiniq. 1941 var'as hinnäst Vinne väkke, 1944 S'aksa väkke ja 1944-1945 jälq Vinne väkke võtmisõ iist. 1945. a. sügüse tull' August mõtsast vällä ja legalisiirü. Tä läts' tüüle Paidra veskihe, s'ollõ et talopidämine Vinne võimo all tälle es passiq. Sääl veskin tüüt' tä aastagil 1945-1949. Suur jago Augusti sõpro olliq mõtsaveleq ja tä käve noidõgaq läbi. 1949. a. hainakuun võtt' KGB tä kinniq ni pääle tüütlemist taht' tä umas agendis tetäq ja käsk' minnäq mõtsaveljo püüdmä. August kõnõl' sõbrolõ, et timäst taheti agenti tetäq. Tä haard' ärq mõtsa minnäq, agaq KGB hääs tüüd es tiiq. Edimädse talvõ var'as hinnäst ütsindäq. 1950 lei kampa Rootsi Jaani mõtsaveljo salgagaq. 1951-1954 var'as hinnäst Suurõ Taivaskua ligidäl punkrin. Tä kuulu Rootsi salga nn. tagalamiiskunda - hoolits' varustusõ, söögi ja eloasõmõ iist. Peräst Rootsi Jaani ja salga juhtvidõ liikmidõ hukkasaamist 1952. a. piimäkuun Räpinä ligidäl Ristipalon ja Taivaskua punkri üleslöüdmist 1954. a. talvõl naas' hinnäst ütsindäq käk'mä. 1954-1978 käkke hinnäst päämidselt kodokandi mõtson. Inämbüse tuust aost oll' tä "üleliidolidsõlt takanotsitav ohtlik kur'ategejä". Augustit otsõq nii Võro kui Põlva KGB. 1978. a. saivaq nääq tä lõpos kätte. Ku 1978. a. süküskuu 27. pääväl KGB ja SORVVO tüütäjä tahiq tedä kinniq võtta, hüpäs tä Võhandu jõkkõ ja uppu.