Progresio
El Vikipedio
Matematiko > Progresio
Progresio estas tia vico da nombroj, ke ĉiu el ili esprimiĝas kiel „simpla" funkcio de la antaŭaj.
- Aritmetika progresio
- Tia progresio, ke ĉiu ĝia termo, esceptante la unuan, estas la aritmetika meznombro de la antaŭa kaj de la posta: 1, 3, 5, 7, 9, 11...; la n-a termo de tia progresio egalas al la sumo de konstanto (la diferenco de la progresio) kun la antaŭa termo. Se tiu diferenco estas signata per d, kaj se la unua termo de la vico estas a, la n-a termo esprimiĝas kiel: a+(n-1)d.
- Geometria progresio
- Tia progresio, ke ĉiu ĝia termo, esceptante la unuan, estas la geometria meznombro de la antaŭa kaj de la posta: 1, 2, 4, 8, 16, 32...; la n-a termo de tia progresio egalas al la produto de konstanto (la kvociento de la progresio) per la antaŭa termo. La ĝenerala termo de geometria progresio estas: a*kn-1, kie n estas la numero de la termo.
- Harmona progresio
- Tia progresio, ke ĉiu ĝia termo, esceptante la unuan, estas la harmona meznombro de la antaŭa kaj de la posta: 1, 1/2, 1/3, 1/4, 1/5, 1/6...; la termoj de tia progresio estas inversoj de la termoj de iu aritmetika progresio.
