Pierre Corret
El Vikipedio
D-ro med. Pierre CORRET [kore'] (naskiĝis en 1881) estis franca esperantisto.
Lia pordoktoreca tezo, kiun li prezentis kun tre granda sukceso, estis: Utileco kaj ebleco de alpreno de internacia helplingvo por la medicino (Utilité et possibilité de l'adoption d'une lange internationale aŭiliaire de la médecine), Parizo, 1908. Li estis ankaŭ tre kompetenta pri radio kaj elpensis aparatojn.
De 1908 ĝis 1911 li estis ĝenerala sekretario de SFPE. Li skribis en diversaj Esperantistaj gazetoj, kaj precipe en Lingvo Internacia, kie, kun Théophile Cart, li energie atakis Idon, kontraŭbatalis ĉiun ŝanĝon aŭ neologismon, kaj partoprenis en la diskutoj inter Cart kaj Carlo Bourlet pri la vortaro Grosjean-Maupin (Franco-Esperanta).
Kiel sciencamanto li skribis en Internacia Scienca Revuo kaj turnis sian atenton precipe al la radio. Li prezidis Internacian Radio-Asocion (fonditan en 1924) kaj estis ĉefredaktoro de "Internacia Radio-Revuo" 1926.
Krom multaj artikoloj kelkaj broŝuroj kaj sia tezo, li verkis:
- Internacia Radio-Leksikono seslingva, 1925.
- Raportoj pri la 2a, 3a, 4a, 5a Kongresoj, 1906-09. (La 2a kaj 3a kun René Artigues).
- Trad. de Jules Romains, Knock, 1932, prezentita dum la XXIV-a Kongreso en Parizo.
Ekde 1909 li estis membro de la Lingva Komitato, ekde 1920 Akademiano.
