Paul Gottfried Christaller
El Vikipedio
Tiu-ĉi artikolo tiras informon el Enciklopedio de Esperanto.
Paul Gottfried CHRISTALLER (kristaler), germano, desegnisto, modlisto, ĉizelisto kaj profesoro por tiuj fakoj en la ŝtata artmetia lernejo en Stuttgart (de 1927 pensiita). Naskiĝis en la 21-a de aŭgusto 1860 en Basel, Svisujo. Destinita unue por la misiista evangeliana servo, li lernis afrikajn lingvojn, poste studis artmetion en Germanujo kaj Italujo. Diversaj liaj artverkoj troviĝas en Stuttgart, Winnenden kaj Kameruno. Esperantisto de 1904.
Je 27-a de januaro 1905 li fondis kun tri kunuloj, Hellriegel, Junginger kaj Obermann la unuan Esperanto-grupon en Stutgarto, kiu estis samtempe la unua en Virtembergo (pli frue fondiĝis la grupo en Freiburg, Badeno); je la fino de l' jaro 1905 ĝi havis 22 anojn. Christaller estis ĝia prezidanto ĝis majo 1933, kiam li demisiis "por ne malutili al la reputacio de nia grupo, mi ja estis pacifisto kaj tiujn homojn oni juĝis kontraŭuloj de la patrujo". Vicprezidanto de GEA, vic-delegito de UEA, 1913-20 LK dekomence kaj akademiano de 1911. Aŭtoro de gravaj vortaroj Esperanto-Germana kaj Germana-Esperanto kaj de multaj gramatikaj studaĵoj, tradukinto de Kant. Vasta informa laboro en Suda Germanujo.
Ĉefaj Verkoj:
sep prop. broŝuroj; gramatika verko, 1909; Vortaroj E - G, 1923, kaj G - E, 1910 kaj 1923; Formulo pri alarmo, (trad.), 1908; Propraj nomoj, 1911; Al eterna paco (trad. de Kant), 1924; Modelaj leteroj por komercistoj (trad.), 1927. Detalojn vd. en la kolekto [1] de IEMW. Kunlaboranto por multaj Esperantaj gazetoj.
Biografioj / nekrologoj:
- http://www.familienforschung-pabst.de/EspBiographien/EspBiogr/Christaller.htm
- H.J. [t.e. Hans Jakob] en Esperanto [UEA] n. 544, mar 1951, p. 75.
- Memornoto. Mortis en la 91-a jaro profesoro k-do Paul G. Christaller (n-o 24.464) Sennaciulo 1951:22:03 (550) mar, p. 8
