Nombro de Esperanto-parolantoj
El Vikipedio
La nombro de Esperanto-parolantoj estas ofte disputata en kaj ekster la Esperanto-komunumo. Tamen estas kelkaj studoj pri ĉi tiu temo.
[redaktu] Taksoj
- 1887: Komence, la lingvon parolis unu homo (eble du -- oni ne certas pri Klara Zamenhof).
- 1889: La fama unua "Adresaro" de Zamenhof havis adresojn de mil homoj. Ĉu ili vere ĉiuj parolis Esperanton, ĉu ne estis multaj nur interesitoj, estas alia afero.
- 1892: En decembro 1892 la gazeto La Esperantisto havis 544 abonantojn. Unuflanke eble ne ĉiuj vere parolis Esperanton, aliflanke kelkaj ekzempleroj estis legataj de pli ol unu persono.
- 1928: Johannes Dietterle anoncis la rezulton de tutmonda enketo, kiu rezultigis, ke proksimume 126 500 homoj parolas Esperanton. Oni ĉiam atentigas ke mankas Sovetunio; estus malfacile taksi ties esperantistojn tiamajn. En 1936 SEU asertis ke ĝi havas 14.237, sed ekzemple la plej granda kategorio de tiuj homoj estis "amikoj de la korespondado pere de Esperanto" (kun eksterlando). Dietterle cetere, kiam li ne sciis pri la grandeco de iu Esperanto-grupo, enmetis la nombron 5.
- 1952: Ivo Lapenna taksas: 380.000 esperantistoj en la mondo. (Esperanto, junio 1952, p. 175.) Laŭ li ekzemple en Ĉinio ĉ. 30.000 homoj finis kurson.
- 1971: Peter Glover Forster: 2,5 milionoj da esperantistoj.
- 1980: Helmar Gunter Frank: 20 milionoj da esperantistoj.
- 1985: Detlev Blanke: 500.000 esperantistoj.
- 1988: Laŭ Sidney S. Culbert de la universitato de Vaŝingtono, 1,6 milionoj da homoj parolas Esperanton je la nivelo "fremdserva nivelo 3". Tiu nombro estas por tiuj, kiuj povas komuniki, ne nur saluti esperante. Culbert ne skribas kiumaniere li atingis tiun nombron. (Almanac World Book of Facts (Almanaka Monda Libro da Faktoj) kaj Ethnologue (sed ambaŭ rondigis ĝin supren al 2 milionoj). Ethnologue ankaŭ asertas ke estas 200-2000 denaskaj Esperanto-parolantoj.)
- Ziko van Dijk dubas pri la altaj nombroj (Esperanto sen mitoj). Li kalkulas, ke se miliono da Esperanto-parolantoj estus disvastigita egaldense tra la mondo, oni atendus trovi 182 en la urbo Kolonjo. Van Dijk trovas "maksimume tridek" en tiu urbo, kaj diras, ke ĝi havas multe pli da esperantistoj ol la averaĝa regiono en la mondo (estante universitata urbo en meza Eŭropo). Li ankaŭ notas, ke UEA kaj la landaj asocioj aliĝintaj al UEA havas kune nur 20.000 membrojn, kaj dubas, ĉu la nombro de la Esperanto-parolantoj estas vere kvindekoblo de la movadanoj.
- 1996: Jouko Lindstedt (la estro de la diskutlisto DENASK-L) faris taksojn, se por vere taksi absolutajn nombrojn, sed por montri la diferencojn inter diversaj lingvaj niveloj:
- 1.000 denaskaj parolantoj
- 10.000 parolas flue, kvazaŭ denaske
- 100.000 povas uzi skribe kaj parole
- 1.000.000 akcepteble komprenas ĝin parolate kaj skribite
- 10.000.000 jam konatiĝis kun ĝiaj elementoj
