Nigra longvosta fazano
El Vikipedio
La nigra longvosta fazano (Syrmaticus mikado) el la ordo de galinoformaj birdoj kaj familio de fazanedoj vivas nur en la montregionoj de meza kaj orienta Tajvano. La tuta korpo de la virbirdo estas kovrita de plumoj brilantaj blupurpure, nur sur la vosto estas blankaj transversaj strioj. Ĝi estas tre bela kaj eleganta. La birdino estas multe malpli bela ol la virbirdo: ĝia korpo plejparte estas olivbruna, kun apenaŭ rimarkeblaj laŭlongaj strioj, la vosta plumaro sin prezentas bruna aŭ kaŝtana, kun makuloj nigrebrunaj. La birdo pezas 600-1 000 g., longas 53-88 cm. kaj ĝia vosto longas 19-23 cm. La postaj randoj de ĝiaj tarsoj estas kovritaj de okangulaj skvamoj. Tio estas ĝia aparta trajto diferenciganta ĝin de ĉiuj aliaj fazanoj. La nigraj longvostaj fazanoj vivas en la arbaroj de montregionoj je 2 000-3 000 m. super la marnivelo aŭ en bambuaroj, inter rokaj krutaĵoj kaj maldensaj arboj sur sunaj montodeklivoj. Ĝenerale, ili tranoktas sur arboj de norda montodeklivo kaj matene transflugas montkulminon por veni al la alia flanko de la monto. La birdo estas singardema kaj kaŝema. Renkontinte danĝeron ĝi tuj forflugas. Se ĝi estas persekutata, ĝi ofte transflugas la montkulminon por reveni al sia tranoktejo sur rokoriĉa suna montodeklivo. Ĝi serĉas kiel siajn manĝaĵojn en densaj arbustaroj aŭ bambuaroj pteridajn plantojn, fragojn kaj ankaŭ insektojn sur sensuna montodeklivo, kie dense kreskas arboj, el kiuj plejparto estas cipresoj kaj kverkoj. Krome tie dense kreskas ankaŭ malaltaj bambuoj, rododendroj kaj aliaj. Ĉiujare la birdoj pariĝas de marto ĝis majo. Ili konstruas neston surtere kaj ĉiufoje kovas 5-10 ovojn. La kovado daŭras 28 tagojn. La vostoplumoj de la nigra longvosta fazano jam delonge estas uzataj kiel ornamajoj. Hodiaŭ pro homaj kaúzoj, la birdoj sin trovas en danĝero esti pereigitaj. Ĉinaj kaj alilandaj zoologoj plurfoje apelaciis por savi tiun raran specion.
