Lourdes
El Vikipedio
Eŭropo > Francio > Akvitanio > Bearno > Lourdes < Katolika pligrimado < Katolikismo < Religio
Lourdes [lurd], okcitanlingve Lorda [lurdo], estas pilgrim-urbeto situanta piede de la montaro Pireneoj en suda Francio, en la departemento Hautes-Pyrénées. Ĝi havas 17 000 loĝantojn. Ĝi allogas ĉiujare milionojn da vizitantoj, ĉar ĝi estas unu el la plej gravaj pilgrimceloj por la katolikoj de la tuta mondo, konsiderata kiel sankta loko. Katolikoj kredas ke la Virgulino Maria aperis en 1858 antaŭ juna knabino, Bernadeta Soubirous, por deklari al ŝi, ke ŝi estas la Senpeka Koncipiteco. Tiu iom enigma frazo apogis la dogmon ĵus proklamitan de Pio la 9-a en 1854, laŭ kiu la Sankta Virgulino estis per speciala graco liberigita el la Origina Peko jam en la ventro de sia patrino. Poste la junulino fariĝis monaĥino kaj estis sanktigita de la katolika Eklezio.
De tiam malsanuloj venas enakviĝi en fonton, kiu situas ĉe la la apero-groto, esperante mirakulan resaniĝon. Oni asertas, ke kelkaj okazas de temp' al tempo kaj Kuracista komitato kontrolas ilin.
La religia komplekso entenas plurajn preĝejojn, kapelojn, krucvojojn, kaj centojn da hoteloj kaj vendejoj. Krom tiu religia komplekso, la urbo posedas interesan mezepokan fortikigitan kastelon staranta sur alta rokego.
