Katenario
El Vikipedio
Katenario estas speciala formo de elektra supertraka kontakta linio de fervojo kaj de trolebusa kontakta linio. Ĝi forte reduktas la malrektiĝon de la ĉefa drato de la linio (pro gravito) per akcesora kablo, pli alta, kiu tenas la ĉefan draton per pontetoj. Tiel eblas multe pli grandaj distancoj inter la apogaj fostoj (mastoj).
Kutime la ĉefa drato de la linio konsistas el solida kupro, kaj la akcesora kablo el plektita bronzo aŭ ŝtalo. Ĉar kurentoprenilo de la veturilo iom levas la kontaktan linion, fiksiloj de la ĉefa drato kaj de la akcesora kablo estas elaste ligitaj, tiel ke la akcesora kablo ne sekvas ĉiujn moviĝojn de la ĉefa drato.
Kontaktaj linioj sen la porta akcesora kablo permesas rapidecon de ne multe pli ol 100 km/h. Katenarioj permesas pluroblon de tiu rapideco.
