Henry Fielding
El Vikipedio
Henry FIELDING (* la 22-an de aprilo 1707, † la 8-an de oktobro 1754) estis angla verkisto.
Naskiĝinte en Sharpam Park apud Glastonbury, Somerset, Fielding estis edukita en la renoma Eton College. En la jaro 1728 li ekstudis juron en Lejdeno. De 1729 ĝis 1737 li aktivis en Londono kiel dramisto kaj teatra direktoro, sed liaj satiraj dramoj elvokis la cenzuron, kiu finfine devigis lin forlasi la teatran laboron.
Ekde tiam li pli forte koncentriĝis al sia jurista kariero, al ĵurnalismaj agadoj kaj al la verkado de romanoj. Lia unua granda sukceso estis An Apology for the Life of Mrs. Shamela Andrews, kiu parodiis la romanon Pamela, verkitan de Samuel Richardson. Lia ĉefverko, la romano The History of Ton Jones, a Foundling, priskribas la vivon de la protagonisto Tom JONES kaj montras samtempe la vivon kaj la morojn de la tiutempa angla socio. En la jaro 1963 tiu ĉi romano estis tre sukcese filmigita (reĝisoro: Tony Richardson).
Henry Fielding mortis en la jaro 1754 en Lisbono.
[redaktu] Listo de verkoj
- The Life and Death of Tom Thumb the Great (farso, 1730)
- Pasquin (satiro, 1736)
- The historical Register for the Year 1737 (satiro, 1737)
- An Apology for the Life of Mrs. Shamela Andrews (romano, 1741)
- The History of the Adventures of Joseph Andrews (romano, 1742)
- The Life of Jonathan Wild the Great (romano, 1743)
- The History of Tom Jones, a Foundling (romano, 1749; filmigita en 1963)
- Amelia (romano, 1751)
- Journal of a Voyage to Lisbon (taglibro, eld. 1755)
[redaktu] En Esperanto aperis:
Renkontiĝo inter pastro Adams kaj pastro Trulliber : (el: Joseph Andrews) / Henry Fielding. - En: Angla antologio. – 1957. - p.276 - 280, vol. 1
