Harold Bolingbroke Mudie
El Vikipedio
Harold BOLINGBROKE MUDIE [mjudi] (naskiĝis la 30-an de junio 1880 en London; mortis la 6-an de januaro 1916) estis angla esperantisto kaj borsisto. Li estis la unua prezidanto de UEA.
Li esperantistiĝis en 1902, leginte pri Esperanto en The Review of Reviews. En novembro 1903 li fondis gazeton The Esperantist, laŭ financa garantio de William Thomas Stead. La gazeto tamen liveris ne perdon, sed profiton. Kiam The Esperantist kunfandiĝis kun The British Esperantist en januaro 1906, li aliĝis al ties redakta komitato. Li multe laboris por la eldono de la Nova testamento en Esperanto.
Li faris multe da alilandaj propagandaj vojaĝoj kaj vizitis ok Universalajn Kongresojn. Li estis unu el la Trio por la Tria.
Li fariĝis unue vicprezidanto, poste (de 1912 ĝis 1916) prezidanto de Brita Esperanto-Asocio. En 1908 li fariĝis prezidanto de la nove fondita UEA. Eduard Stettler nomis lin "naskita prezidanto" pro liaj retorikaj kapabloj. Li estis membro de la Lingva Komitato.
Mudie post la komenciĝo de la Unua mondmilito aliĝis la armeon kaj faris rapidan karieron. En januaro 1916 kapitano Mudie mortis pro aŭtomobila akcidento en Francio. Nur en 1919 oni elektis novan UEA-prezidanton, nome la antaŭan vicprezidanton Hector Hodler.
| La unua versio de tiu ĉi artikolo estis prenita de la Enciklopedio de Esperanto (EdE en ekstera arkivo). |
