Glacia groto Espero
El Vikipedio
Glacia groto Espero estas konsiderata kiel la plej longa ĉeĥa glacia groto. Ĝi estas de pseŭdokarsta deveno. Verŝajne per gravitaj fortoj ĉi tie disstariĝis fendaĵoj de rokmasivo, profunde difektita per frostiga eroziiĝo. Tial la groto havas formon de abismoforma vertikala krevaĵo de direkto oriento – okcidento, kun profundeco 6 m kaj longeco ĉirkaŭ 30 m. Ties daŭrigon en la masivon ŝtopiĝas ŝtonblokoj kaj argilo. Kun la surfaco kunigas ĝin nur unusola aperturo, kondukanta sub rokmasivo.
Dank‘ al norda orientado de la enirejo kaj al ties perfekta ombrigo en montararbaro, en la fundo de la groto amasiĝas vintre pli peza frostiga aero kreanta ĉi tie glaciajn formaciojn – gutŝtonojn. Iliaj restaĵoj pludaŭras en la groto dum la tuta jaro.
La enirejo de la groto estas fermita per krado, sed tra kiu eblas bone vidi ĝis ties fundo. Libere alirebla estas do sole la enirejo de la groto, malsupreniro ĝis la fundo ne estas permesita pro sekureckaŭzoj.
La groto situas en distrikto Česká Lípa en norda deklivo de monteto Suchý vrch, 1,5 km de vilaĝo Naděje (Espero), 5 km de Cvikov kaj proksimume 9 km de Nový Bor.
