Ĥristo Gorov

El Vikipedio

Ĥristo GOROV (1908-1999), ankaŭ konata sub la plumnomo ĤRIMA, estis bulgara kaj esperantista verkisto kaj politika aktivulo.

[redaktu] Vivo

Gorov naskiĝis la 18-an de julio 1908 en la vilaĝo Gorni Brodi, apud Seres (nun en Greklando). Li frue orfiĝis. Kiel juna laboristo avide kleriganta sin, li lernis E-on en 1925 kaj rapide manifestis literaturan talenton, kiun Internacia Asocio de Revoluciaj Esperantaj Verkistoj rekonis per sia membreco. Li unue aktivis en la kadro de SAT, publikigante multajn poemojn en Sennaciulo, kaj poste daŭrigis sian laboron en la kadro de IPE kaj IAREV. Li aŭtoris sub la pseŭdonimo Ĥrima la poemaron Poemo de l'Plugisto (1930), la rakontaron Ĉe abismo (1931) kaj la novelon Du frontoj (1932). Li fondis kaj redaktis sekretan stencil-gazeton laboristan, Sturmulo, kaj estis en 1935 malliberigita por pli ol du jaroj pro laborista E-agado. Kontraŭfaŝisma partizano en la dua mondmilito, en la posta komunisma reĝimo li laboris en la partia aparato, ĉe ties Centra Komitato kaj ĉe la Ministra Konsilantaro. Dum jardekoj Gorov estis membro de la centra estraro de Bulgara E-Asocio kaj ĝia plej longdaŭra prezidanto (1960-64 kaj 1976-87). Sub lia gvidado BEA gajnis la Trofeon Fyne de UEA en 1987. Li longe servis kiel komitatano de UEA (1977-89), estrarano de Mondpaca E-ista Movado kaj de pluraj aliaj E-organizaĵoj. Li kunaranĝis la UK-ojn en Sofio (1963) kaj Varno ( 1978) kaj IFEF-kongresojn en Varno (1967) kaj Slanĉev Brjag (1984). En 1983 aperis lia poemaro Ribela kordo; en 1986 lia originala proza verkaro Mia verda pado. Li sisteme iniciatis la eldonadon de tradukoj el la bulgara, redaktis kaj kompilis multajn el ili, kiel Septembra poezio (1982), Bulgara nuntempa poezio kaj prozo (1985) kaj Bukedo (1985). Ankaŭ en la bulgara li verkis, ne malpli ol 13 librojn. Pli ol 70 jarojn aktiva esperantisto, li estis deklarita Honora Membro de UEA en la Berlina UK, antaŭ ol venis informo pri lia forpaso nurajn 4 tagojn pli frue, la 28-an de julio en Sofio (Bulgario).