Guåhån
From Wikipedia
Gaige islan Guåhån gi mås yahåyaya gi kadenan Marianas ya guiya mås dånkulu entre todu i isla yan úniku minantietieni niʼ i Estados Unidos desde 1898 na sakkan. Ma fa'nana'an i isla "Tollai Amerika asta guatu Asia" saʼ put i minåolek pusisión-na gi yeogråfiku yan ekonomia. Ma tatáncho este na isla kåsi 9700 (nuebi mit siete sientos) kilumetro gi geʼlichan San Francisco, 6000 (sais mit) kilumetro geʼlichan låo sumanhaya patte gi ya Honolulu, 2400 (dos mit kuatro sientos) kilumetro gi hayan i kattan Tokyo, 3400 (tres mit kuatro sientos) kilumetro kattan sanhayan Hong Kong yan 2400 (dos mit kuatro sientos) kilumetro gi kattan Manila.
550 (kinientos sinkuenta) kuadrao kilumetro mineddong-na Guåhån ya kåsi 50 (sinkuenta) kilumetro anåkkoʼ-na yan sais asta kinse kilumetro fineddaʼ-na gi taloʼ. Pinetma niʼ botkanu i sanhaya na patte ya i attura-na kåsi 400 (kuatro sientos) metro linekkaʼ-na. Finetma i taloʼ yan sankattan na patten i isla niʼ i åchoʼ afok ya i kantít-na siha pumoddong papaʼ esta i kanton unai.
Manestaba esta i manChamorru gi islan Guåhån antes di manhalom i Españót gi 1600 na siklo despues di finatton Fetnando Magallanes. Annok gi manatatte na infotmasión na kasse sinaʼ mås di tres mit kinientos maloffan na tiempo na manggaige i manChamorru gi kadenan Marianas låo ti ma tungoʼ amanu na gaige i haleʼ-niha pat tinituhon-niha este na rasa.
