El Primero Pagina

Presidenta Gloria Macapagal-Arroyo

Gloria Macapagal-Arroyo (Nacimiento: 5 de Abril, 1947 na San Juan, Metro Manila), el aca-14 y presentamente Presidenta de las Filipinas (electado del año 2004). Ele es el segundo mujer presidenta despues con Corazon Aquino. Ele es el hija del antes presidente Diosdado Macapagal. Casao con Jose Miguel Arroyo del año 1968.

Antes ya queda presidenta, si Arroyo es el primero mujer vice-presidenta. Ele ya subi na posicion como presidenta del año 2001 por medio del EDSA II cuando ya quita con Joseph Estrada na poder na medio de maga acusacion de corrupcion. Con Arroyo ya electa del eleccion 2004 donde ya perde el actor Fernando Poe Jr..

Del año 2005 el Forbes magasin ya selecta con Arroyo como el aca-cuatro bien poderoso mujer na entero mundo.

Por el su educacion elementaria y segundaria, si Arroyo ya atende escuela na Convento de la Asunción. Ele ya gradua como valedictorian na clase del año 1964. Despues, si Arroyo ya atende escuela na Georgetown University con el prestigioso Walsh School of Foreign Service na Washington D.C. donde ya queda si Bill Clinton, el antes Presidente del Estados Unidos, su compañero de clase y donde si Arroyo conforme na lista del decano. Si Arroyo, despues, ya gradua magna cum laude con el titulo Bachiller de Artes en Economia na Assumption College del año 1968. Aquel mismo año, ya casa si Arroyo con el un abogado y negociante de Negros Occidental Jose Miguel Arroyo. Tiene ellos dos niños y unica hija: Juan Miguel (nacimiento: 1969), Evangelina Lourdes (nacimiento: 1971) y Diosdado Ignacio Jose Maria (nacimiento: 1974).

Si Arroyo ya porsigui alto estudio y del año 1978, ya gradua Maestro de Economia desde'l Ateneo de Manila University y del año 1985, Doctor de Economia desde'l Universidad de las Filipinas. Desde 1977 hasta 1987, si Arroyo ya ensiña na maga diferente escuela y ya obtene maga diferente posicion hasta ele ya queda presidenta del Departamento de Economia na Assumption College.

Del año 1987, si Arroyo ya trabaja como ayudanta del secratario del Departamento de Negocio y Industria. Dos años despues, ele ya queda bajo secretario del departamento y director ejecutivo tambien del Garments and Textile Export Board donde subido el crecimiento del industria de tela.

Ya electa con Arroyo como senadora del año 1992 y 1995. Como Senadora, Si Arroyo ya escribi mas de 400 maga como se llama na Ingles 'bill' o proyecto de ley donde 55 de estos ya queda ley de importancia economia incluyendo el Anti-Sexual Harassment Law, el Indigenous People's Rights Law y el Export Development Act.

Año 1998 cuando con Arroyo ya electa como vice-presidenta de presidente Joseph Estrada y secretaria del bien estar y desarollo del administracion Estrada.