Paolo Borsellino
El Vikipedio
Paolo BORSELLINO naskiĝis la 19-an de januaro 1940 en Palermo kaj estis murdita la 19-an de julio 1992 samurbe. Li estis itala juĝisto kaj famiĝis kiel batalanto kontraŭ mafio.
Li laboris unue en Monreale kaj en 1975 estis sendita al Palermo, kie li laboris sub juĝisto Rocco Chinnici. Ek de 1980 li laboris en kontraŭ-mafia laborgrupo sub Chinnici kun du aliaj juĝistoj (Falcone kaj Barrile) kaj du komisaroj. Kvankam la mafio mortigis Chinnici per bombo, la grupo sukcesis akuzi kaj kondamnigi kelkajn mafiajn gravulojn. Kiam la grupo en 1985 preparis "procesegon" kontraŭ centoj da mafiuloj, estis murditaj la du komisaroj. Borsellino kaj Falcone transloĝiĝis al la prizono de Asinara por tie labori en relativa sekureco.
En majo 1992 la mafio murdis Falcone, kaj monaton poste eksplodigis 100-kilograman bombon, kiam Borsellino iris viziti sian patrinon en strato via D'Amelio en Palermo. La bombo mortigis lin kaj kvin el liaj gardistoj.
Jaron poste fondiĝis "litotuka komitato", kiu sur litotukoj presis bildojn de Borsellino kaj Falcone kun la teksto "vi ne mortigis ilin – iliaj ideoj marŝas sur niaj gamboj".
Multaj lernejoj kaj asocioj estis nomitaj honore al Borsellino. La flughaveno de Palermo portas lian nomon kaj tiun de lia kolego Giovanni Falcone.
